Zu meiner Kinnerzeit in de 50er Johr hot’s das bei us immer an Silvester genn. Ähmoh im Johr, an Silvester hot de Opa es Esse gemach. Er hatt ins Haus ingeheirat, das Rezept mitbraacht unn wusst als änzicher wie. An Silvester morjens is in de Stuh en Bied uff zwei Stiehl gestallt wor. Do drin hot de Opa gemengt. Wenn er dann fertig war, sinn die Schüssele nous gestallt wor for kalt ze were und omends hot’s Galerei genn. Jed Johr, bis de Opa nimmee konnt. Es Rezept is ganz änfach: gesalz Eisbein unn ore Wutzefießjer gar koche, dann klän schneire, in die Brieh ä Lorbeerblaat, ä Zwiewel, Peffer, zwei bis drei gekochte Eier, entwere Weißbrot- ore Weckstickcher. Alles zesamme kalt were losse. Eisbein in Aspik sieht so ähnlich aus, is awer kä Galerei, bei weirem nitt. Unn wär doch aach bestimmt kä Festesse for Silvester. Kann awer Galerei moh ebbes extra Gures gewes sin? Es kann vun mittelhochdeitsch „galreide“ unn domit noch weirer zurick aus em Lateinische „gelatus“ komme. „Gelatus“ häßt änfach „kalt“, unn kalt hot misse die Galerei gess were. Hunsrücker Festesse war die Galerei, wenn iewerhaupt, nor in wenich Dörfer, unn do aach manichmoh nor in änzelne Häiser, so wie bei us.
Josef Peil